İndiyədək Əmək və Əhalinin Sosial Müdafiəsi Nazirliyinin təqdim etdiyi elektron xidmətlərə ümumilikdə 22 milyon 200 min dəfə müraciət olunub.

Bu, “Elektron hökumət” portalına daxil olan müraciətlərin 38 faizi deməkdir.

Novator.az xəbər verir ki, Əmək və Əhalinin Sosial Müdafiəsi Nazirliyi 2017-ci ilin noyabrında nazirliyə edilən elektron müraciətlərin sayını da açıqlayıb.

Bildirilir ki, noyabrda nazirliyə 644 min 710 dəfə elektron müraciət daxil olub və bu, ötən ilin eyni dövrünə nisbətən 13,2 faiz çoxdur.

Noyabrda elektron müraciətlər əmək müqaviləsi bildirişlərinin qeydiyyata alınması üzrə 31,8 faiz, bildirişlər barədə məlumatların əldə edilməsi üzrə 50 faiz, əmək qabiliyyətinin müvəqqəti itirilməsinə görə müavinətlə bağlı haqq-hesab cədvəlinin təqdim edilməsi üzrə 13,8  faiz, sığortaolunanın onlayn uçota alınması üzrə 57 faiz artıb.

Hamiləliyə və doğuma, uşağın anadan olmasına, uşağın üç yaşı tamam olanadək ona qulluq etməyə görə müavinətlərlə bağlı haqq-hesab cədvəllərinin təqdim edilməsi və digər e-xidmətlərə də müraciətlərin sayında artım var.