Ticarət festivalının nəticələri
Mədəniyyət və Turizm Nazirliyi oktyabrın 15-dən noyabrın 15-dək keçirilmiş ikinci Bakı Ticarət Festivalının nəticələrini açıqlayıb. Rəsmi hesabata görə, nazirliyin nəzdində fəaliyyət göstərən Azərbaycan Konqreslər Bürosunun təşkil etdiyi festivalda xüsusi kampaniya və 10%-dən 70%-dək endirimlərlə alış-veriş aparılıb.
Nazirlik bildirir ki, festival müddətində 643 mağaza iştirakçı kimi qeydiyyatdan keçib və onlardan 493-ü alış məbləğinin 10,2% həcmində ƏDV qaytarma proqramına qoşulub. “Tax Free” sistemi ilə birgə ümumi dövriyyə 33 milyon 826 min 864 manat olub və banklar alıcılara 3 milyon 366 min 702 manat ƏDV qaytarıblar.
Hesabata əsasən, oktyabr ayı ərzində Azərbaycana 204686 turist gəlib, bu, keçən ilin müvafiq dövrünə nisbətən 13% artım deməkdir.
Novator.az qeyd edir ki, ticarət festivalları dövründə fiziki şəxslərin Azərbaycanda aldığı, istehsal, yaxud kommersiya məqsədləri üçün nəzərdə tutulmayan mallara görə ödənilmiş əlavə dəyər vergisi qaytarılır. İlk ticarət festivalı aprelin 10-dan mayın 10-dək keçirilib.
“Tax Free” sistemi əcnəbilərin və vətəndaşlığı olmayan şəxslərin Azərbaycan ərazisində aldığı, istehsal, yaxud kommersiya məqsədləri üçün nəzərdə tutulmayan mallara görə ödədiyi əlavə dəyər vergisinin qaytarılmasını tənzimləyir.
