İşğalçının 28-ci səfəri
Azərbaycanın işğal olunmuş cənub-qərb bölgəsinə qanunsuz səfər edən Ermənistan prezidenti Serj Sərkisyan dekabrın 1-i Xankəndidə hərbi müşavirəyə qatılıb. Novator.az-ın məlumatına görə, separatçı Dağlıq Qarabağ rejiminin başçısının, Ermənistanın müdafiə nazirinin də iştirak etdiyi müşavirədə işğalçı ordunun komandanı Levon Mnasakanyanın məruzəsi dinlənib, işğal zonasındakı durum müzakirə olunub.
Dekabrın 2-də isə Serj Sərkisyan hərbi təlimi izləyib, işğalçı orduya məxsus bəzi obyektlərə baş çəkib.
1988-ci ilin fevral ayında Dağlıq Qarabağ erməniləri bölgəni Ermənistana birləşdirmək tələbi ilə separatçı hərəkata, işğalçı müharibəyə başlayıb. 1991-ci il sentyabrın 2-də Dağlıq Qarabağ özünü müstəqil dövlət elan edib. 1994-cü ildə atəşkəslə dayanan müharibədə Ermənistan Silahlı Qüvvələri Dağlıq Qarabağı və onun ətrafındakı 7 rayonu tutub.
2008-ci ildən prezident postunu tutan Serj Sərkisyan 28-ci dəfədir Azərbaycanın Qarabağ bölgəsinə qanunsuz səfər edir. 1954-cü ildə Xankəndidə doğulan Serj Sərkisyan uzun illər Dağlıq Qarabağın komsomol və partiya orqanlarında rəhbər vəzifələrdə çalışıb.
O, işğalçı müharibənin qaniçən liderlərindən biridir. 1989-cu ildən Dağlıq Qarabağ separatçılarının komandanı, 1993-cü ildən Ermənistanın müdafiə naziri olub.
1995-2008-ci illərdə Serj Sərkisyan Dövlət Təhlükəsizliyi İdarəsinin rəisi (sonradan milli təhlükəsizlik naziri), daxili işlər və milli təhlükəsizlik naziri (sonradan yenə milli təhlükəsizlik naziri), Prezident Aparatının rəhbəri, Milli Təhlükəsizlik Şurasının katibi (eyni zamanda müdafiə naziri), baş nazir kürsülərini tutub.
