Penitensiar Xidmətin İxtisaslaşdırılmış Müalicə Müəssisəsində saxlanan sabiq polis polkovnik-leytenantı Hacı Məmmədov intihar edib. Hadisə dekabrın 3-də baş verib.
Xəzər Rayon Prokurorluğundan APA-ya verilən məlumata görə, Bakının Binə qəsəbəsində yerləşən müəssisədə müalicə alan Hacı Məmmədov özünü asıb.
Olay Cinayət Məcəlləsinin 125-ci maddəsi ilə (özünü öldürmə həddinə çatdırma) araşdırılır. İstintaqı Bakı Şəhər Prokurorluğu aparır.
Novator.az bildirir ki, Daxili İşlər Nazirliyinin Baş Cinayət Axtarış İdarəsinin baş əməliyyat müvəkkili olmuş Hacı Məmmədov 2005-ci ilin martında adam oğurluqları və qətllərə görə tutulub. Ümumən bu iş üzrə 26 nəfər mühakimə olunub. Məhkəmə Hacı Məmmədova, Daxili İşlər Nazirliyinin Baş Cinayət Axtarış İdarəsinin keçmiş rəisi general-mayor Zakir Nəsirova və daha 8 nəfərə ömürlük həbs cəzası kəsib.
2017-ci il martın 16-da prezident İlham Əliyevin imzaladığı əfv sərəncamı ilə Zakir Nəsirovun cəzası 15 il həbslə əvəz edilib, bir müddət sonra isə o, azadlığa buraxılıb.
Hacı Məmmədov 2005-ci il martında tutulandan sonra Milli Təhlükəsizlik Nazirliyinin (indiki Dövlət Təhlükəsizliyi Xidmətinin) təcridxanasında saxlanıb. 2016-cı ilin yazında o, səhhətindəki problemlərə görə İxtisaslaşdırılmış Müalicə Müəssisəsinə köçürülmüşdü.
