Avropanın içki liderləri
Avropa İttifaqında əhalinin alkoqola xərclədiyi vəsait açıqlanıb. Novator.az-ın məlumatına görə, Avropa İttifaqının Statistika Xidməti bildirir ki, 2016-cı ildə alkoqollu içkilərə ümumilikdə 130 milyard avro xərclənib. Bu, Avropa İttifaqının ümumi daxili məhsulunun 0,9%-i deməkdir. Spirt istehlak xərclərinin orta hesabla 1,6%-ni təşkil edir.
Statistiklərin hesabatına görə, Avropa İttifaqına üzv ölkələr içərisində spirtli içkilərə ən çox pul xərcləyən Baltik ölkələri əhalisidir.
Reytinq cədvəlinə Estoniya liderlik edir. 2016-cı ildə bu ölkədə əhalinin istehlak xərclərinin 5,6%-i alkoqollu içkilərə gedib. Sonrakı yerlərdə Latviya (xərclərin 4,8%-i) və Litva (xərclərin 4,2%-i) qərarlaşıb.
Siyahıda sonrakı pillələrdə Polşa və Çexiya gəlir. Ötən il bu ölkələrin sakinləri vəsaitlərinin 3,6%-ni spirtli içkiyə xərcləyib.
Hesabata əsasən, 2016-cı ildə Avropada spirtli içkiyə ən az pul xərcləyən İspaniya əhalisi olub – 0,9%.
Avropa İttifaqının 28 üzvü var: Almaniya, Avstriya, Belçika, Bolqarıstan, Böyük Britaniya, Çexiya, Danimarka, Estoniya, Finlandiya, Fransa, Xorvatiya, İrlandiya, İspaniya, İsveç, İtaliya, Kipr, Latviya, Litva, Lüksemburq, Macarıstan, Malta, Niderland, Polşa, Portuqaliya, Rumıniya, Slovakiya, Sloveniya, Yunanıstan. Böyük Britaniya qurumdan çıxmaq üzrədir.
Səidə Hüseynova
