Sərkisyan tələbələri əsgər aparan qanunu imzaladı
Noyabrın 29-da Ermənistan prezidenti “Hərbi xidmət və hərbi qulluqçunun statusu haqqında” qanunu imzalayıb. Novator.az xəbər verir ki, qüvvəyə minən qanun təhsilə görə hərbi xidmətdən möhlətin ləğvini nəzərdə tutur. Hərbi xidmətdən möhlət yalnız Müdafiə Nazirliyi ilə mülki müqavilə bağlayan şəxslərə veriləcək. Belə müqavilə bağlayan şəxslər ali təhsilin bakalavr pilləsini başa vurduqdan sonra 3 il hərbi xidmət keçməlidir. Adi hərbi xidmət 2 ildir.
Parlament müzakirələri zamanı erməni tələbələr hərbi xidmətdən möhlət hüququnun ləğvini etirazla qarşılayıb, aksiyalar keçirib, amma bunun bir faydası olmayıb.
Azərbaycanın “Hərbi vəzifə və hərbi xidmət haqqında” qanununa əsasən, bakalavriat, magistratura və doktorantura səviyyələrində təhsil alanların hərbi xidmətə çağırışdan möhlət hüququ var. Xarici ölkələrdə oxuyan bakalavr, magistr və doktorantlara, rezidentura (internatura) təhsili alanlara, o cümlədən Azərbaycan prezidentinin müəyyən etdiyi elmi təşkilatda təhsil alan şəxslərə də möhlət hüququ verilir.
