Zimbabveyə yeni rəhbər gəlir
37 ildən çox Zimbabveyə rəhbərlik edən 93 yaşlı Robert Muqabe noyabrın 21-də istefa verib. Noyabrın 15-də hərbçilər onu əsir alıb prezident postundan çəkilmək tələbi qoymuşdular.
Robert Muqabe 1980-ci ilin aprelindən Zimbabvenin baş naziri olub, 1987-ci ildən isə prezident idi. O, dövlət başçısı postuna sonuncu dəfə 2013-cü ildə seçilmişdi.
Novator.az-ın məlumatına görə, dövlət başçısı postuna Emmerson Mnanqaqva gətirilir.
Emmerson Mnanqaqva 1946-cı ildə anadan olub. 1972-ci ildə London Universitetini bitirib. Zimbabvenin 1980-ci ildə müstəqilliyə qovuşmasında xüsusi xidməti olan şəxslərdən biridir. 1980-1988-ci illərdə dövlət təhlükəsizliyi naziri olub, müxtəlif illərdə ədliyyə naziri, maliyyə naziri, parlament sədri vəzifələrini tutub.
2014-cü ildən Emmerson Mnanqaqva birinci vitse-prezident olub. 2017-ci il noyabrın 6-da o, postundan çıxarılıb və ölkəni tərk edib. Noyabrın 15-də Robert Muqabe əsir alınandan sonra ölkəyə qayıdıb.
