Bu il nə qədər hərbi sursat və mina zərərsizləşdirilib?
Azərbaycan Respublikası Ərazilərinin Minalardan Təmizlənməsi üzrə Milli Agentliyi (ANAMA) yeni hesabat yayıb. Qeyd olunur ki, yanvarın 1-dən noyabrın 19-dək Ağdam, Ağcabədi, Ağstafa, Füzuli, Şamaxı, Xızı, Beyləqan, Bərdə, Hacıqabul, Tovuz, Qazax, Qəbələ, Yevlax, Goranboy, Gədəbəy, Qaradağ, Daşkəsən, Salyan, Şəmkir, Xocavənd, Göygöl, Lənkəran və Cəbrayıl rayonları, Bakı, Sumqayıt, Lənkəran, Gəncə, Mingəçevir, Şirvan və Tərtər şəhərlərində 7518 ədəd partlamamış hərbi sursat, 203 ədəd tank əleyhinə mina və 33 ədəd piyada əleyhinə mina aşkar olunaraq zərərsizləşdirilib, 4 milyon 799 min 792 kvadratmetr ərazi yoxlanıb.
Noyabrın 19-da isə Cəbrayıl rayonunun Cocuq Mərcanlı kəndində təmizləmə əməliyyatı aparılıb. ANAMA-dan AZƏRTAC-a bildiriblər ki, gün ərzində 10 min kvadratmetr ərazi tam təmizlənib, 5500 kvadratmetr ərazi xüsusi mexaniki vasitələrlə təmizləmə üçün hazırlanıb, mina və partlamamış hərbi sursat aşkar edilməyib.
Üç gün ərzində 2 ədəd partlamamış hərbi sursat tapılıb, 31 min kvadratmetr ərazi tam təmizlənib, 19 min kvadratmetr ərazi təmizləmə üçün hazırlanıb.
