İt saxlamaq insana necə təsir göstərir?
İt saxlayanlar digərləri ilə müqayisədə bir neçə ay uzun ömür sürürlər. Novator.az-ın məlumatına görə, İsveçin Upsala Universitetinin bir qrup alimi bu qənaətə gəlib.
Alimlər bununla bağlı “Scientific Reports” jurnalında məqalə dərc etdiriblər.
2001-ci ildən aparılan araşdırmanı İsveç hökuməti maliyyələşdirir. Upsala Universitetinin alimləri araşdırma çərçivəsində indiyədək 3 milyon 400 min adamın səhhətini izləyib, ürək və qan-damar vəziyyəti ilə bağlı nəticələri analiz ediblər.
Alimlər müəyyən ediblər ki, it insana, əsasən də tənha adamlara çox müsbət təsir göstərir. İt saxlayanlar saxlamayanlara nisbətən daha gec ölürlər. İt saxlamaq vaxtsız ölüm riskini 33% aşağı salır, ürək, qan-damar xəstəliklərini isə 11% azaldır.
Araşdırmaya görə, itin göstərdiyi müsbət təsirin gücü onun hansı cinsdən olmasından asılıdır. Belə ki, ov itinin sahibləri dekorativ it və şəhər iti saxlayanlarla müqayisədə daha çox yaşayırlar.
Amma itin insana niyə müsbət təsir göstərdiyi hələ aydın deyil. Alimlər bunun nə ilə əlaqədar olduğunu dəqiq müəyyən edə bilməyiblər. Güman olunur ki, əsas səbəblər itin insanı gəzintiyə daha çox vaxt ayırmağa məcbur etməsində və həyata sevinc qata bilməsindədir.
Səidə Hüseynova
