İctimai Televiziya və Radio Yayımları Şirkəti Avropa Yayım Birliyinə etiraz məktubu göndərib. Məktubda qeyd olunur ki, Ermənistan təmsilçisi Mikael Qriqoryanın (Mişa) Gürcüstanda keçiriləcək “Uşaq Avrovizya” mahnı müsabiqəsində siyasi təxribata yol verəcəyi haqqında məlumatlar Azərbaycanda böyük narahatlıq doğurub: “Qriqoryanın Xankəndi əsilli olmasını bəhanə edərək qondarma “Dağlıq Qarabağ Respublikası”na məxsus bayrağı nümayiş etdirməsi və “Arsaxın səsi” adlı musiqi qrupunun üzvü olduğunu vurğulaması yolverilməzdir.

İctimai Televiziya və Radio Yayımları Şirkəti inanmaq istəyir ki, siyasi oyunlardan uzaq olduğunu dəfələrlə bəyan edən Avropa Yayım Birliyi bu həssas məsələdə Azərbaycanın mövqeyini anlayışla qarşılayacaq, siyasi təxribatın qarşısını qətiyyətlə alacaq, bütün Avropanın nəzərlərinin dikildiyi səhnədə uşaqların separatizmin qurbanına və siyasi oyunbazların alətinə çevrilməsinə imkan verməyəcək”.

Novator.az bildirir ki, “Uşaq Avrovizya”sı noyabrın 26-sı Tbilisidə keçiriləcək. 16 ölkənin qatıldığı müsabiqədə Ermənistanı təmsil edəcək Mişanın 9 yaşı var. O, “Bumeranq” adlı mahnını ifa edəcək.

1988-ci ildən Ermənistan Dağlıq Qarabağ bölgəsini Azərbaycandan qoparmaq üçün təcavüzə başlayıb. 1991-ci ildə erməni separatçılar Dağlıq Qarabağı “müstəqil dövlət” elan edib. Bunun ardınca alovlanan işğalçı müharibədə Dağlıq Qarabağ və onun ətrafındakı 7 rayon Ermənistanın nəzarətinə keçib.