Dünya futbol çempionatının final mərhələsinə adlayan komandaların sayı 30-a yüksəlib. Novator.az-ın məlumatına görə, noyabrın 14-ü Avropada seçmə mərhələnin son görüşü keçirilib. Dublində İrlandiyanı 5:1 hesabı ilə yenən Danimarka final raunduna vəsiqə alıb (ilk oyunda qol vurulmamışdı).

Dünənəcən dünya çempionatının final raunduna 29 milli komanda çıxmışdı. 2018-ci ilin iyun-iyul aylarında keçiriləcək çempionatda ev sahibi Rusiya ilə yanaşı Avropadan Fransa, İsveç, Portuqaliya, İsveçrə, Almaniya, Serbiya, Polşa, İspaniya, İngiltərə, Belçika, İslandiya, Xorvatiya, Afrikadan Tunis, Nigeriya, Mərakeş, Seneqal, Misir, Şimali və Mərkəzi Amerikadan Meksika, Kosta Rika, Panama, Cənubi Amerikadan Braziliya, Uruqvay, Argentina, Kolumbiya, Asiyadan İran, Cənubi Koreya, Yaponiya, Səudiyyə Ərəbistanı da qatılacaq.

Qalan 2 vəsiqənin sahibi Avstraliya – Honduras, Peru – Yeni Zelandiya matçlarında bəlli olacaq. İlk oyunlarda hesab açılmayıb.