Mənzillərdə, ofislərdə Wi-Fi siqnalının gücünü və sürətini idarə etmək üçün yeni üsul tapılıb.

Novator.az xəbər verir ki, bunu ABŞ-ın Darmut Kollecinin mütəxəssisləri kəşf ediblər.

Alimlər öncə xatırladırlar ki, evlərdə, ofislərdə Wi-Fi siqnalının sürətini antena vasitəsilə artırmaq mümkündür, amma bu qurğu bahalı, onun istismarı isə mürəkkəbdir. Ona görə də mütəxəssislər ev şəraitində əllə idarə olunacaq qurğu yaratmağı düşünüblər.

Alimlər bildirirlər ki, routerin (şəbəkədən siqnalı qəbul edərək qurğuya ötürən xüsusi yarımstansiya) arxasına alüminium plitə qoymaqla siqnalı bir istiqamətdə gücləndirmək olar. Belə bir reflektoru modernləşdirmək üçün alimlər kompüter alqoritmi (təlimatı) yazıblar. Bu alqoritmin köməyi ilə otağın sahəsini, Wi-Fi siqnalının tutduğu nöqtənin yerini və siqnalın arzulanan istiqamətini hesablamaq mümkündür.

Mütəxəssislər istifadəçi parametrləri əsasında yaradılmış simsiz reflektorun 35 ABŞ dollarına başa gələcəyini deyirlər. Onlar yeni qurğunun 1000 dollarlıq antenanı əvəz edə biləcəyini iddia edirlər.

Reflektorun təcrübədən keçirilməsi göstərib ki, texnologiya arzuolunmaz yerlərdə Wi-Fi siqnalını 10 desibel azalda, lazım olan nöqtədə isə 6 desibel artıra bilir.

Səidə Hüseynova