Qırğını törədənin özünü öldürdüyü açıqlanıb
ABŞ-ın Texas ştatında kilsəyə silahlı hücumun bir neçə detalı bəlli olub. Novator.az-ın məlumatına görə, kilsəyə silahlı hücum çəkən Devin Kelli hadisədən sonra intihar edib. Texas ştatının İctimai Təhlükəsizlik Departamenti belə açıqlama yayıb.
Devin Kelli noyabrın 5-i San-Antonio şəhəri yaxınlığındakı baptist kilsəsinə avtomatik tüfənglə hücum çəkərək atəş açıb. Silahlı hücumda 26 nəfər həlak olub, 20 nəfər yaralanıb. Hücumçu hadisə yerindən bir az aralıda güllə yarası ilə ölü tapılıb.
Polisin son məlumatına görə, Devin Kelli kilsədəkiləri atəşə tutduqdan sonra üstündə silah olan 55 yaşlı Steven Uilford onu yaralayıb. Maşını ilə olay yerindən bir az uzaqlaşan Devin Kelli özünü öldürüb.
Qanlı hadisədə yaralananların 14-nün hazırda xəstəxanada olduğu bildirilir. Onlardan 10-nun vəziyyəti ağırdır.
26 yaşlı Devin Kellinin 2010-2014-cü illərdə Hərbi Hava Qüvvələrində xidmətdə olduğu, 2014-cü ilin mayında tribunalın qərarı ilə ordudan qovulduğu bildirilir. Qeyd olunur ki, Devin Kelli həyat yoldaşına və uşağına hücum hazırlamaq ittihamı ilə 12 ay həbsdə yatıb.
