“Əmək pensiyaları haqqında” qanuna 1 iyul 2017-ci ildə qüvvəyə minmiş dəyişikliyə əsasən, yaşa görə pensiya alan şəxs işləməkdə davam edərsə, hər 6 ildən bir onun hesabında toplanmış sosial sığorta haqqı 72-yə (6 il×12 ay) bölünərək onun pensiyasının üzərinə gəlinir.

Dövlət Sosial Müdafiə Fondu işləməyən əmək pensiyaçısı kateqoriyasına keçdikdən, yaxud pensiya təyin olunduğu gündən sonra 6 il və daha çox müddətdə işləyən şəxslərin müraciətləri əsasında onların pensiyalarının yenidən hesablanaraq artırılmasını həyata keçirir. Əmək və Əhalinin Sosial Müdafiəsi Nazirliyinin noyabrın 7-də yaydığı məlumata görə, indiyədək ölkə üzrə 7692 nəfər pensiyaçı bu hüquqdan yararlanıb və onların pensiyasının aylıq məbləği orta hesabla 175,7 manat artırılıb. Artımlara yönəldilən əlavə vəsaitin aylıq məbləği isə 1,35 milyon manat təşkil edib.