“Vəhşi diviziya” (I hissə)
Azərbaycan Milli Elmlər Akademiyasının Mərkəzi Elmi Kitabxanası “Vəhşi diviziya” adlı qısametrajlı tarixi film hazırlayıb.
Filmdə çar Rusiyası dönəmində Azərbaycan və Qafqazın müsəlman xalqlarından yaradılmış və diviziyaya daxil olan könüllü süvari alaylarının, həmçinin tatar (azərbaycanlı) alayının Birinci Dünya müharibəsində iştirakından bəhs edilir.
Qafqaz yerli süvari diviziyasında (“Vəhşi diviziya”) azərbaycanlıların xüsusi yeri olub.
Diviziyada şahzadə Feyzulla Mirzə Qovanlı-Qacar, Hüseyn xan Naxçıvanski, Nur bəy Sofiyev, Cəmşid xan Naxçıvanski kimi məşhur azərbaycanlı hərbçilər qulluq edib.
“Vəhşi diviziya”nın, xüsusən də tatar alayının müharibə dövründəki şücaəti misilsiz olub. Belə ki, məhz tatar alayının hərbçiləri Azərbaycan Xalq Cümhuriyyəti ordusunun formalaşmasında vacib rol oynayıblar.
Qeyd edək ki, tariximizin bu dönəmi çox az araşdırılıb. Təəssüf ki, “Vəhşi diviziya” barədə tarixi araşdırma və sənədli filmlərin hazırlanmasına baxmayaraq azərbaycanlıların bu hərbi qurumda rolu arxa planda qalıb.
Mərkəzi Elmi Kitabxana bu film vasitəsilə azərbaycanlıların diviziyadakı qəhrəmanlıqlarını ön plana çəkməyə çalışıb.
Mərkəzi Elmi Kitabxananın ictimaiyyətlə əlaqələr bölməsindən Novator.az-a bildiriblər ki, hazırkı film gələcəkdə bu mövzuda hazırlanması planlaşdırılan silsilənin birinci hissəsidir.
