ÜAK yuxarı instansiyaya üz tutdu
Qeydiyyatı ləğv olunmuş Ümumrusiya Azərbaycan Konqresi (ÜAK) noyabrın 2-də Rusiya Ali Məhkəməsinin Rəyasət Heyətinə müraciət edib. Xəbəri APA yayıb.
Rusiya Ali Məhkəməsi mayın 15-də Ədliyyə Nazirliyinin istəyi ilə ÜAK-nin qeydiyyatının ləğvinə qərar verib. Ədliyyə Nazirliyinin iddiasında 2001-ci ildən fəaliyyət göstərən ÜAK-də nəzarət-təftiş tədbirləri zamanı Rusiya qanunvericiliyinin və qurumun nizamnaməsinin pozuntularının aşkarlandığı, nöqsanların aradan qaldırılması tövsiyələrdən nəticə çıxarılmadığı əsas gətirilib.
Sentyabrın 19-da Rusiya Ali Məhkəməsinin qərarından apellyasiya şikayəti üzrə proses başa çatıb. Ali Məhkəmənin Apellyasiya Kollegiyası şikayəti təmin etməyib, birinci instansiyanın qərarı qüvvədə qalıb.
ÜAK Rəyasət Heyətinə müraciətində Apellyasiya Kollegiyasının qərarının ləğvini istəyir.
