Kataloniya müstəqil dövlət elan olundu
İspaniyanın Kataloniya vilayətinin parlamenti oktyabrın 27-də bölgənin müstəqil dövlət elan olunması barədə qətnamə qəbul edib.
Novator.az xatırladır ki, 1979-cu ildə muxtariyyət almış Kataloniya vilayətində bu il oktyabrın 1-də keçirilmiş referenduma qatılanların çoxu bölgənin müstəqil dövlət elan olunmasına tərəfdar çıxıb.
Kataloniya başçısı Karles Puçdemont oktyabrın 10-u Barselonada, yerli parlamentin iclasında bölgənin müstəqil dövlət elan olunması barədə bəyannamə imzalayıb.
Rəsmi Madrid bütün bunların qanunsuz olduğunu bildirir, heç bir hüquqi qüvvə daşımadığını vurğulayır.
Oktyabrın 27-də İspaniya parlamentinin yuxarı palatası olan Senat Kataloniya hökumətinin buraxılması, idarəçilik səlahiyyətlərinin mərkəzi orqanlara ötürülməsi, 6 ay ərzində vilayətdə yeni parlament seçkisinin keçirilməsi barədə qərara baxır. Təqdimatı oktyabrın 21-də İspaniya hökuməti verib.
