“Azərsu” əhaliyə görə 15 milyon manat aldı
Prezident İlham Əliyev istehlakçıların suölçən cihazlarla təmin edilməsi üçün əlavə tədbirlərə sərəncam verib. Sərəncam “Azərsu” Açıq Səhmdar Cəmiyyətinə 2017-ci ilin dövlət büdcəsindən 15 milyon manat ayrılmasını nəzərdə tutur.
Novator.az-ın məlumatına görə, sənəddə qeyd olunur ki, əhaliyə verilən içməli suyun keyfiyyətini yaxşılaşdırmaq dövlətin prioritetləri sırasındadır və bu sahədə müntəzəm işlər görülür: “Son illər qəbul olunmuş dövlət proqramlarının icrası nəticəsində regionların içməli su təchizatı və kanalizasiya infrastrukturu yenidən qurulub, sakinlərin içməli su ilə fasiləsiz təminatı sahəsində nailiyyətlər əldə edilib.
İstehlakçılara göstərilən xidmətlərin keyfiyyətini artırmaq, əhalinin sağlamlığının və təhlükəsizliyinin qorunmasının başlıca meyarlarından biri olan dövlət standartlarına uyğun keyfiyyətli içməli suyun fasiləsizliyini təmin etmək, habelə istehlak edilən suyun uçotunu dəqiq aparmaq və itkilərin qarşısını almaq məqsədilə müvafiq suölçən cihazların quraşdırılması başlıca şərtdir”.
