Vergilər Nazirliyində təkrar çəkişmələr
Vergi Apellyasiya Şurasına daxil olan müraciətlər haqqında hesabat açıqlanıb. Rəsmi məlumata görə, 2017-ci ilin 9 ayında Vergilər Nazirliyinin Apellyasiya Şurasının icraatında 67 müraciət olub. Müraciətlərin 10-u əvvəlki ildən qalıb, 57-si isə cari ilə aiddir.
İcraata götürülmüş müraciətlərin 16-sı səyyar vergi yoxlamalarını, 26-sı kameral vergi yoxlamalarını, 7-si operativ vergi nəzarətini, 2-si eyni zamanda həm kameral, həm də səyyar vergi yoxlamalarını, 2-si ümidsiz borc məbləğinin silinməsini, 2-si vergitutma metodunun dəyişdirilməsini, 2-si inzibati şikayətin verilməsi üçün buraxılmış müddətin bərpa edilməsini, 2-si bank hesablarına qoyulmuş sərəncamların qanunsuz sayılmasını, 1-i artıq ödəmənin qaytarılmasını əhatə edib.
11 müraciətin tam, 2 müraciətin qismən təmin olunması barədə qərarlar çıxarılıb. 2 vergi ödəyicisində inzibati icraat zamanı aşkarlanan halların araşdırılması məqsədilə növbədənkənar səyyar vergi yoxlaması təyin olunub. 5 müraciət təmin edilməyib.
Bir sıra müraciət üzrə vergi ödəyicilərinin şikayətlərinin predmeti ilə bağlı cinayət işinin istintaqının davam etməsi, digərlərinin eyni predmet üzrə iddia ərizələrinə məhkəmədə baxıldığı üçün onların icraatına xitam verilib. Bəzi müraciətlər geri götürüldüyü, şuranın eyni məzmunlu müraciətlər üzrə müvafiq qərarları olduğu və müraciət predmeti aradan qalxdığı üçün baxılmadan saxlanıb.
Novator.az bildirir ki, Vergi Apellyasiya Şurası 7 mart 2008-ci ildən fəaliyyət göstərir. Bu quruma vergi orqanlarının inzibati aktlarından verilmiş ərizə və ya şikayətlərin (korrupsiya ilə əlaqədar hüquqpozmalarla bağlı müraciətlər istisna olmaqla) nəticəsi üzrə inzibati qərarlardan narazı olanlar müraciət edir.
