Gürcüstan yenə arzunu seçdi
Hakim Gürcü Arzusu – Demokratik Gürcüstan Partiyası oktyabrın 21-də keçirilmiş bələdiyyə seçkilərində önə çıxıb. Həmin gün seçicilər 5 şəhər və 59 rayon üzrə mer, 64 bələdiyyə üzrə məclis seçkilərinə qatılıb. Marafonda 22 partiya və 5 blok iştirak edib.
Bələdiyyə məclislərinin 1088 deputatı majoritar sistemlə, 970 üzvü partiya siyahıları üzrə seçilir. Novator.az-ın məlumatına görə, Gürcü Arzusu – Demokratik Gürcüstan Partiyası proporsional sistem üzrə 55,73% səs alıb.
Vahid Milli Hərəkat bloku 17,07% səslə ikinci, Avropa Gürcüstanı bloku 10,4% səslə üçüncü, Gürcüstan Vətənpərvərləri Alyansı 6,56% səslə dördüncü olub.
Mer postları uğrunda mübarizədə də hakim partiya üstün gəlib. 1 şəhər və 4 rayonda ikinci turun olacağı gözlənir.
Hakim Gürcü Arzusu – Demokratik Gürcüstan Partiyası parlamentdəki 150 yerdən 115-nə sahibdir.
