Nazirlərin və həmsədrlərin birgə bəyanatı
Azərbaycanın və Ermənistanın xarici işlər nazirləri ATƏT-in Minsk qrupunun həmsədrləri ilə birgə bəyanat veriblər. Bəyanatda deyilir ki, Azərbaycan prezidenti İlham Əliyev və Ermənistan prezidenti Serj Sərkisyan oktyabrın 16-sı Cenevrədə zirvə görüşü keçiriblər. Minsk qrupunun həmsədrləri İqor Popov (Rusiya), Stefan Viskonti (Fransa) və Endrü Skoferin (Amerika Birləşmiş Ştatları) himayəsi altında keçirilən görüşdə xarici işlər nazirləri Elmar Məmmədyarovla Edvard Nalbandyan da iştirak ediblər. Zirvə görüşünə ATƏT sədrinin şəxsi nümayəndəsi Anjey Kasprşik də qatılıb.
Azərbaycan Xarici İşlər Nazirliyinin mətbuat xidməti bildirir ki, bəyanatda görüşün konstruktiv mühitdə keçdiyi vurğulanır: “Prezidentlər danışıqlar prosesini intensivləşdirmək üçün tədbirlər görməyə və təmas xətti boyunca gərginliyi azaltmaq üçün əlavə addımlar atmağa razılaşıblar. Həmsədrlər çox uzun fasilədən sonra baş tutan bu birbaşa danışıqlardan razılıq ifadə ediblər. Onlar Dağlıq Qarabağ münaqişəsinin danışıqlar vasitəsilə sülh yolu ilə həlli üçün tərəflərlə işləməyə hazır olmaqda qalırlar. Növbəti addım kimi həmsədrlər yaxın gələcəkdə xarici işlər nazirləri ilə işçi görüş keçirəcəklər”.
