Cenevrədə görüş
Oktyabrın 16-da prezident İlham Əliyev İsveçrənin Cenevrə şəhərində ermənistanlı həmkarı Serj Sərkisyanla görüşüb. Görüşdə ATƏT-in Minsk qrupunun həmsədrləri və ATƏT-in fəaliyyətdə olan sədrinin xüsusi nümayəndəsi iştirak ediblər.
Xəbəri AZƏRTAC yayıb.
Prezidentlərin İsveçrənin BMT-nin mənzil-qərargahında və başqa beynəlxalq təşkilatlardakı nümayəndəsinin iqamətgahında təkbətək görüşdükləri də bildirilir.
Bununla da İlham Əliyevin İsveçrə Konfederasiyasına səfəri başa çatıb.
Novator.az qeyd edir ki, bu, Azərbaycan və Ermənistan prezidentlərinin 2008-ci ildən bəri 22-ci, 2017-ci ildə ilk görüşü olub.
1988-ci ildə başlayan Qarabağ müharibəsində Ermənistan Azərbaycanın Dağlıq Qarabağ bölgəsini və Laçın, Kəlbəcər, Qubadlı, Zəngilan, Cəbrayıl, Füzuli, Ağdam rayonlarını, eləcə də Qazax rayonunun 7, Naxçıvan Muxtar Respublikasının 1 kəndini işğal edib. 1994-cü ildə elan olunan atəşkəsdən bəri sülh danışıqları heç bir nəticə vermir.
Hazırda sülh danışıqları Madrid prinsipləri əsasında aparılır. Minsk qrupu həmsədrlərinin 2007-ci ildə Madriddə irəli sürdüyü prinsiplər Dağlıq Qarabağ ətrafında olan rayonların mərhələlərlə Azərbaycanın nəzarətinə qaytarılması şərti ilə bölgənin yekun statusunun müəyyənləşməsini nəzərdə tutur.
