Naxçıvana 1450 kilometrlik yol açıla bilər
Bakıdan Naxçıvana dəmir yolu işə düşə bilər. “Azərbaycan Dəmir Yolları” QSC-nin sədri Cavid Qurbanov jurnalistlərə deyib ki, Türkiyə və ya İrandan bu xəttin yaradılması mümkündür: “Bakı-Tbilisi-Qars dəmir yolu xətti istifadəyə verildikdən sonra Qarsdan Sədərəkə dəmir yolu xətti çəkilə bilər. Bu layihənin dəyəri 2-2,5 milyard dollardır. Türkiyənin bu maliyyəni nə vaxt ayıracağı məlum deyil.
Bakıdan Naxçıvana dəmir yolu əlaqəsini İran istiqamətindən də həyata keçirmək mümkündür. “Şimal-Cənub” Beynəlxalq Nəqliyyat Dəhlizi tikildikdən sonra İrandan Naxçıvana dəmir yolu çəkmək mümkün olacaq. Bu yolun maliyyə dəyəri 1 milyard dollar təşkil edir. İran yolun torpağını almağı öhdəsinə götürüb. Bütün tikinti işləri yekunlaşandan sonra İrandan keçməklə, 1450 kilometr ötməklə Bakıdan Naxçıvana gedə bilərik. Dövlət başçısı bu layihənin reallaşmasında maraqlıdır”.
Naxçıvana Qarabağ bölgəsi və Ermənistandan keçən dəmir yolu xətti 25 ildən çoxdur bağlanıb.
Xəbəri AZƏRTAC yayıb.
