Kabinetin iş qaydası təsdiqlənib
Prezident İlham Əliyev fərman imzalayaraq Nazirlər Kabinetinin iş qaydasını təsdiqləyib. Novator.az bildirir ki, sənəd Nazirlər Kabinetinin Azərbaycan Konstitusiyasında təsbit edilmiş və prezidentin aktları ilə ona həvalə olunmuş səlahiyyətlərin həyata keçirilməsinin təşkili qaydalarını müəyyən edir.
Qaydaya görə, baş nazir Nazirlər Kabinetinin işini təşkil edir, iclasları aparır. Nazirlər Kabinetinin iclasında prezident iştirak etdikdə sədrlik ona keçir.
Baş nazir məzuniyyətdə və ya ezamiyyətdə olduqda, yaxud səlahiyyətlərini müvəqqəti icra edə bilmədikdə onun səlahiyyətlərini baş nazirin birinci müavini, bu da mümkün olmadıqda baş nazirin müəyyənləşdirdiyi digər müavini icra edir.
Baş nazir prezidenti Nazirlər Kabinetinin işi barədə mütəmadi məlumatlandırmalıdır.
Nazirlər Kabineti hər il Milli Məclisin yaz sessiyasının beşinci iclasında öz fəaliyyəti haqqında hesabat verir. Milli Məclis qarşısında hesabatla baş nazir və ya onun birinci müavini, prezidentin tapşırığı olduqda isə Nazirlər Kabinetinin müvafiq üzvü çıxış edir.
Prezidentin 10 oktyabr fərmanı ilə Nazirlər Kabinetinin Aparatı haqqında əsasnamə də təsdiq edilib. Əsasnaməyə görə, Nazirlər Kabinetinin Aparatı ali kateqoriyalı dövlət orqanıdır. Aparat Prezident Administrasiyası və mərkəzi icra hakimiyyəti orqanları ilə qarşılıqlı əlaqəli surətdə fəaliyyət göstərir.
Nazirlər Kabinetinin Aparatı bilavasitə baş nazirə və onun müavinlərinə tabedir. Aparat rəhbərini prezidentlə razılaşdırmaqla baş nazir təyin edir.
Azərbaycan Konstitusiyasında Nazirlər Kabinetinin statusu prezidentin yuxarı icra orqanı kimi müəyyən olunub. Ana qanuna görə, ölkə prezidenti icra səlahiyyətlərinin həyata keçirilməsinin təşkili məqsədi ilə Nazirlər Kabineti yaradır. Prezidentə tabe olan, onun qarşısında cavabdehlik daşıyan qurumun əsas səlahiyyətləri dövlət büdcəsinin hazırlanması və icrası, maliyyə-kredit və pul siyasətinin, dövlət iqtisadi və sosial proqramlarının həyata keçirilməsi, nazirliklərə və digər mərkəzi icra hakimiyyəti orqanlarına rəhbərlikdir.
