Seçki indi keçirilsə…
Rusiya İctimai Rəy Fondunun yeni sorğusunun nəticələrinə görə, prezident seçkisi indi keçirilsə, seçicilərin 68%-i dövlət başçısı Vladimir Putinə səs verər.
Prezident seçkisi 2018-ci ilin martında keçiriləcək. Seçki kampaniyası bu ilin dekabr ayında başlayır.
Novator.az bildirir ki, sorğu sentyabrın 30-u və oktyabrın 1-i 73 federasiya subyektinin 207 yaşayış məntəqəsində, 3 min respondent arasında aparılıb.
Sorğunun nəticələrinə görə, respondentlərin 8%-i Liberal Demokrat Partiyasının sədri Vladimir Jirinovskiyə, 3%-i Kommunist Partiyasının lideri Gennadi Züqanova, 1%-i Ədalətli Rusiya Partiyasının rəhbəri Sergey Mironova səs verməyə hazır olduğunu bəyan edib.
Daha 1% başqa namizədi dəstəkləmək fikrindədir.
Sorğuya cəlb olunanların 8%-i seçkiyə gəlmək istəmədiyini bildirib.
Oktyabrın 7-də Vladimir Putinin 65 yaşı tamam olur. O, 1999-cu ilin avqustunda baş nazir təyin olunub, dekabrın 31-dən həmçinin prezident vəzifəsini icra edib. 2000 və 2004-cü illərdə prezident seçilib.
2008-ci ildə baş nazir kürsüsünə qayıdan Vladimir Putin 2012-ci ildən yenidən prezident postunu tutur.
Səidə Hüseynova
