“Turan” agentliyi fəaliyyətini bərpa edir
Oktyabrın 1-dən “Turan” agentliyi fəaliyyətini əvvəlki miqyasda bərpa edir.
Novator.az xəbər verir ki, bununla bağlı sentyabrın 29-da agentliyin kollektivi müraciət yayıb.
Müraciətdə xatırladılır ki, agentlik sentyabrın 1-dən öz işini əhəmiyyətli dərəcədə dayandırmaq məcburiyyətində qalmışdı: “Bu, Vergilər Nazirliyinin vergidən yayınma barədə uydurma ittihamı ilə cinayət işi açmasının və agentliyin direktoru Mehman Əliyevin həbsinin nəticəsi idi.
2017-ci ilin avqust-sentyabr aylarında “Turan” 27 illik tarixində ən çətin dövrünü yaşadı, amma onun da öhdəsindən gəldi.
Bununla bağlı ətraflı məlumat hələ yazılacaq, amma bu gün əminliklə deyə bilərik ki, söz azadlığını boğmağa müvəffəq olmadılar.
İctimaiyyətin – siyasi və ictimai xadimlərin, parlament deputatlarının, ziyalıların, jurnalist həmkarlarımızın və sadəcə sıravi vətəndaşların hamılıqla dəstəyi olmasaydı, bu, mümkün olmazdı.
Beynəlxalq təşkilatların və ilk növbədə dəstəyin əlaqələndiricisi missiyasını öz üzərinə götürən “Sərhədsiz reportyorlar”ın geniş və fəal dəstəyi olmasaydı, “Turan” “sağ qala” bilməzdi.
Beynəlxalq koalisiyaya daxil olan onlarla hüquq müdafiə təşkilatı və jurnalist qurumu da bizim müdafiəmiz üçün səsini yüksəltdi.
Azərbaycanın mühacirətdə olan fəalları da öz imkanları daxilində bizə əllərindən gələn dəstəyi göstərdilər, müxtəlif instansiyalarda söz azadlığı məsələlərini qaldırdılar.
ABŞ Dövlət Departamentinin, Norveç, Fransa, Böyük Britaniya Xarici İşlər nazirliklərinin, Avropa İttifaqının, Almaniya ombudsmanının mövqeyini qeyd etməsək, olmaz.
Avropa Şurasının baş katibi Torbyorn Yaqlandın və ATƏT-in mətbuat azadlığı üzrə nümayəndəsi Arlem Dezirin, Avropa Şurasının Azərbaycan üzrə məruzəçiləri Stefan Şennak və Sezar Predanının şəxsi addımlarını qeyd edirik.
Sərt və prinsipial mövqe tutan Amerika konqresmenləri və senatorları Makkeyn, Smit, Makqovern, Durbin, Rubio, Oyerə xüsusi minnətdarlığımızı bildiririk”.
Müraciətin sonunda bildirilir: “Hörmətli oxucular, “qara sentyabr” geridə qaldı və ümid edirik ki, agentliyin işində qalan digər problemlərə də onunla birlikdə son qoyulacaq. İnanırıq ki, uydurma cinayət işi bağlanacaq. Bu inamla oktyabrın 1-dən işimizi əvvəlki həcmdə bərpa edirik.
Bizimlə birlikdə olan hər kəsə təşəkkürlər!”
Avqustun 7-də Vergi Cinayətlərinin İbtidai Araşdırılması Departamenti “Turan” agentliyinə cinayət işi qaldırıb. Avqustun 16-da agentliyin ofisində axtarış aparılıb, mühasibat sənədləri və maliyyə fəaliyyəti ilə bağlı elektron daşıyıcılar götürülüb.
Avqustun 24-də agentliyin direktoru Mehman Əliyev Vergilər Nazirliyinin “Turan”dakı yoxlamaları zəminində tutulub. Avqustun 25-də Yasamal Rayon Məhkəməsi onu 3 aylıq həbs edib. Mehman Əliyev qanunsuz sahibkarlıq, vergidən yayınma və vəzifə səlahiyyətlərindən sui-istifadədə ittiham olunub.
Vergi ödəməkdən yayınma üzrə cinayət işi çərçivəsində “Turan”ın hesabları dondurulub, agentliyin fəaliyyəti məhdudlaşıb.
Yasamal Rayon Məhkəməsi sentyabrın 11-də Mehman Əliyevi həbsdən buraxıb. Mehman Əliyev barədə başqa yerə getməmək haqqında iltizam qətimkan tədbiri seçilib.
Sentyabrın 18-də “Turan” informasiya agentliyinin bank hesabları açılıb.
