Avqustun 16-da Vergilər Nazirliyinin əməkdaşları “Turan” informasiya agentliyinin redaksiyasında (Bakı, Süleyman Rəhimov küçəsi, 186) axtarış aparmağa başlayıb. “Turan”ın direktoru Mehman Əliyev Novator.az-a deyib ki, axtarış Nəsimi Rayon Məhkəməsinin çıxardığı qərara əsasən aparılır: “Hər şeyə baxılır, sənədlər, disklər, kompüterlər yoxlanır”.

Bu ilin may ayında vergi orqanının apardığı kameral yoxlamada “Turan”a 3 min 744 manat 36 qəpik vergi məbləği hesablanıb. Agentliyin nazirliyə şikayətindən sonra işə yenidən baxılıb, qərar ləğv edilib. Ancaq avqustun 7-də Vergilər Nazirliyi yanında Bakı Şəhər Lokal Gəlirlər Departamenti agentliyə 26 min 907 manat 20 qəpik mənfəət vergisi hesablandığını bildirib. Avqustun 8-də Vergilər Nazirliyi yanında Vergi Cinayətlərinin İbtidai Araşdırılması Departamentinin nümayəndəsi agentliyə gələrək növbədənkənar səyyar vergi yoxlaması haqda qərar təqdim edib və mühasibat sənədlərini istəyib.

Agentlik vergilər nazirinə ünvanladığı inzibati şikayətdə Vergi Məcəlləsinə əsaslanaraq bildirir ki, növbədənkənar səyyar vergi yoxlaması vergi ödəyicisinin gəlirləri və ya vergitutma obyektini (gizlətməsi) azaltması əlamətləri aşkar edildikdə və bu barədə mənbəyi bəlli olan məlumat əldə olunduqda keçirilə bilər: “Lakin yoxlama haqda qərarda təşkilatın ümumiyyətlə gəlirləri və ya vergitutma obyektini gizlətməsi, yaxud azaltmasına dair heç bir məlumat öz əksini tapmayıb, tapmadığına görə də heç bir mənbəyə istinad edilməyib”.