Lütfi Zadə vətən torpağına qovuşdu
Sentyabrın 29-da alim Lütfi Zadə Bakıda, Fəxri xiyabanda torpağa tapşırılıb. Dəfn mərasimində dövlət və hökumət rəsmləri, elm xadimləri və ictimaiyyətin nümayəndələri iştirak ediblər.
Lütfi Zadə (Lütfəli Rəhim oğlu Ələsgərzadə) 1921-ci il fevral ayının 4-də Bakı şəhərində anadan olub. 10 yaşında ailəsi ilə birlikdə İrana köçüb.
Tehran Universitetini elektrik mühəndisliyi ixtisası üzrə bitirən Lütfi Zadə Amerika Birləşmiş Ştatlarının Massaçusets Texnologiya İnstitutunda və Kolumbiya Universitetində magistr və doktor elmi dərəcələri alıb.
1959-cu ildən Kaliforniya ştatındakı Berkli Universitetinin ömürlük professoru seçilib, 1963-cü ildən bu ali məktəbin elektrik mühəndisliyi və kompüter elmləri kafedrasına rəhbərlik edib və Yumşaq Hesablamalar üzrə Berkli Təşəbbüsünün rəhbəri kimi fəaliyyət göstərib.
Lütfi Zadə sentyabrın 6-sı ABŞ-da dünyasını dəyişib. Alim Azərbaycanda dəfn olunmasını vəsiyyət edib.
