Lütfi Zadənin cənazəsi Bakıya gətirilib
Mərhum alim Lütfi Zadənin cənazəsi sentyabrın 29-na keçən gecə Bakıya gətirilib. Heydər Əliyev Beynəlxalq Aeroportunda cənazənin qarşılanması mərasimində elm xadimləri və ictimaiyyət nümayəndələri iştirak ediblər. Mərhumun cənazəsi xüsusi ayrılmış maşında Heydər Məscidinə aparılıb.
Lütfi Zadə sentyabrın 6-sı ABŞ-da vəfat edib (Rəsmi nekroloq). O, Azərbaycanda dəfn olunmasını vəsiyyət edib. Azərbaycan hakimiyyəti alimin Bakıda, Fəxri xiyabanda dəfn edilməsinə qərar verib.
Lütfi Zadə (Lütfəli Rəhim oğlu Ələsgərzadə) 1921-ci il fevral ayının 4-də Bakı şəhərində anadan olub. O, ibtidai təhsilini 16 saylı məktəbdə alıb, on yaşında ailəsi ilə birlikdə İrana köçərək 1930-cu illərdə Tehranda təhsilinə davam edib, 1944-cü ildə Tehran Universitetini elektrik mühəndisliyi ixtisası üzrə bitirib.
Lütfi Zadə 1944-1959-cu illər arasında Amerika Birləşmiş Ştatlarının Massaçusets Texnologiya İnstitutunda və Kolumbiya Universitetində magistr və doktor elmi dərəcələri alıb, 1959-cu ildən Kaliforniya ştatındakı Berkli Universitetinin ömürlük professoru seçilib, 1963-cü ildən bu ali məktəbin elektrik mühəndisliyi və kompüter elmləri kafedrasına rəhbərlik edib və Yumşaq Hesablamalar üzrə Berkli Təşəbbüsünün rəhbəri kimi fəaliyyət göstərib.
