Albert Aqarunovun xatirə lövhəsi açılıb
Qubada dağ yəhudilərinin yığcam yaşadıqları Qırmızı qəsəbədə Azərbaycanın Milli Qəhrəmanı Albert Aqarunovun xatirəsi əbədiləşdirilib. AZƏRTAC xəbər verir ki, sentyabrın 28-i qəsəbədə, Albert Aqarunovun adını daşıyan küçədə Milli Qəhrəmanın xatirə lövhəsi açılıb. Tədbirdə rəsmi şəxslər, Milli Qəhrəmanın döyüş yoldaşları, ailə üzvləri və qəsəbə sakinləri iştirak ediblər.
Albert Aqarunov 1969-cu il aprelin 25-də Bakının Əmircan qəsəbəsində yəhudi ailəsində doğulub. Tank komandiri olan Albert Aqarunov Xankəndi, Daşaltı, Cəmilli istiqamətində gedən döyüşlərdə erməni işğalçılarının xeyli canlı qüvvəsini və zirehli texnikasını məhv edib. O, 23 yaşında olarkən, 1992-ci il mayın 8-də Şuşa uğrunda gedən döyüşlərdə snayper gülləsinə tuş gələrək döyüş meydanında qəhrəmancasına şəhid olub.
Bakının Şəhidlər xiyabanında dəfn edilən döyüşçü Azərbaycan prezidentinin 7 iyun 1992-ci il fərmanı ilə Azərbaycanın Milli Qəhrəmanı adına layiq görülüb.
