Azərbaycanın Sərhəd Qoşunlarına kim komandanlıq edir? Dövlət Sərhəd Xidməti bu sualı cavabsız qoyur.
Bu il iyunun 5-də prezident Dövlət Sərhəd Xidmətinin əsasnaməsinin və strukturunun dəyişdirilməsi haqda fərman imzalayıb. Sənəd Dövlət Sərhəd Xidməti rəisindən Sərhəd Qoşunlarının komandanı statusunun alınmasını da nəzərdə tutur. Həmin vaxtadək Dövlət Sərhəd Xidmətinin rəisi avtomatik olaraq Sərhəd Qoşunlarının komandanı idi.
İyunun 5-də general-polkovnik Elçin Quliyev yenidən Dövlət Sərhəd Xidmətinin rəisi təyin edilib, ancaq Sərhəd Qoşunlarının komandanı postuna yeni təyinat olmayıb.
Avqustun ortalarında Novator.az saytı “Hazırda Sərhəd Qoşunlarının komandanı səlahiyyətlərini kim icra edir” sualı ilə Dövlət Sərhəd Xidmətinə müraciət edib. Yazılı informasiya sorğusuna cavab almaq üçün çoxsaylı müraciətlər zamanı Dövlət Sərhəd Xidmətinin mətbuat mərkəzindən hər dəfə bildirilib ki, redaksiya ilə əlaqə saxlayıb sualı cavablandıracaqlar. Ancaq bu günə qədər Novator.az sualına cavab ala bilməyib. Halbuki “İnformasiya əldə etmək haqqında qanun”un 54-cü maddəsinə görə, informasiya sorğusu 7 iş günündən gec olmayaraq icra edilməlidir.
