Azərbaycanın xarici işlər naziri Elmar Məmmədyarov Nyu-Yorkda ATƏT-in Minsk qrupunun həmsədrləri İqor Popov (Rusiya), Stefan Viskonti (Fransa) və Endrü Skoferlə (ABŞ) görüşüb. Sentyabrın 23-də yayılan rəsmi məlumata görə, ATƏT sədrinin şəxsi nümayəndəsi Anjey Kasprşikin də iştirak etdiyi görüşdə Dağlıq Qarabağ münaqişəsinin həlli üzrə danışıqlar prosesi ətrafında müzakirələr aparılıb. Elmar Məmmədyarov Azərbaycanın münaqişənin həlli üzrə mövqeyini bir daha diqqətə çatdırıb.

Sentyabrın 22-də Ermənistanın xarici işlər nazir Edvard Nalbandyan da həmsədrlər və ATƏT sədrinin şəxsi nümayəndəsi ilə bir araya gəlib.

1988-ci ilin fevralında Ermənistan Azərbaycanın Dağlıq Qarabağ bölgəsini özünə birləşdirmək üçün işğalçı müharibəyə başlayıb. 1994-cü ildə atəşkəslə dayanan müharibədə Ermənistan Dağlıq Qarabağı və onun ətrafındakı 7 rayonu işğal edib. O vaxtdan bəri ATƏT-in Minsk qrupunun vasitəçiliyi ilə aparılan sülh danışıqları heç bir nəticə vermir. 1992-ci ildə yaradılan Minsk qrupunun 11 üzvü var: Rusiya, Fransa, ABŞ, Belarus, Almaniya, İtaliya, İsveç, Finlandiya, Türkiyə, Ermənistan, Azərbaycan.