Parisdə erməni bayrağı endirilib
Diasporla İş üzrə Dövlət Komitəsindən Novator.az-a verilən məlumata görə, Fransa paytaxtı Parisdə sentyabrın 22-də başlayan Beynəlxalq Qastronomiya Festivalı ərəfəsində erməni təxribatı qeydə alınıb.
Sena çayı sahilində qurulmuş üç günlük tədbirə 40 ölkə, o cümlədən Azərbaycan qatılıb. Fransada Azərbaycanın Dostları Assosiasiyasının baş katibi və Paris Azərbaycan Evinin rəhbəri Mirvari Fətəliyeva bildirib ki, tədbirə hazırlıq işləri zamanı ermənilər təxribata əl atıb. Şəhərcikdə qurulan Ermənistan çadırında Dağlıq Qarabağdakı separatçı rejimin qondarma bayrağı asılıb. Azərbaycan diaspor rəhbərinin məsələyə müdaxiləsindən sonra təxribatın qarşısı alınıb və bayraq endirilib.
Beynəlxalq Qastronomiya Günlərində Paris sakinləri, o cümlədən turistlər Azərbaycan çadırında zəngin mədəni irs nümunələri ilə tanış ola bilər. Tədbirdə Azərbaycan mətbəxindən isti yeməklər, şirniyyatlar, içkilər sərgilənir, onların dequstasiyası və satışı təşkil olunur, əl işləri, milli sənətkarlıq nümunələri, geyim və bəzək əşyaları nümayiş etdirilir, musiqilər səsləndirilir.
