“Turan”ın vergi müşkülü
“Turan” informasiya agentliyi vergi borcu ilə bağlı yeni məlumat yayıb. Qeyd olunur ki, sentyabrın 18-də Vergilər Nazirliyindən “Turan”ın elektron poçtuna məktub daxil olub. Sentyabrın 15-də imzalanmış məktuba əsasən, “Turan”ın 36 min 547 manat vergi borcu var. Bunun 27 min 253 manatı əsas borc, 9 min 294 manatı hesablanmış faizlərdir.
Agentlik bildirir ki, Bakı Şəhər Lokal Gəlirlər Departamentindən sentyabrın 12-də daxil olmuş, sentyabrın 11-də imzalanmış məktubda “Turan”ın hər hansı vergi borcu və ya cərimə sanksiyasının olmadığı bəyan edilmişdi.
Avqustun 7-də Vergi Cinayətlərinin İbtidai Araşdırılması Departamenti agentliyə cinayət işi qaldırıb. Avqustun 16-da agentliyin ofisində axtarış aparılıb, mühasibat sənədləri və maliyyə fəaliyyəti ilə bağlı elektron daşıyıcılar götürülüb.
Avqustun 24-də agentliyin direktoru Mehman Əliyev Vergilər Nazirliyinin “Turan”dakı yoxlamaları zəminində tutulub. Avqustun 25-də Yasamal Rayon Məhkəməsi onu 3 aylıq həbs edib. Mehman Əliyev qanunsuz sahibkarlıq, vergidən yayınma və vəzifə səlahiyyətlərindən sui-istifadədə ittiham olunub.
İstintaq iddia edib ki, Mehman Əliyev 2010-2014-cü illərdə dövlət qeydiyyatına alınmamış qrant müqavilələri üzrə 148310 manat məbləğində qanunsuz gəlir əldə edib, 2010-2016-cı illərdə 60080 manat məbləğində mənfəət vergisini dövlət büdcəsinə ödəməkdən yayınıb.
Vergi ödəməkdən yayınma üzrə cinayət işi çərçivəsində “Turan”ın hesabları dondurulub, agentliyin fəaliyyəti dayanıb.
Yasamal Rayon Məhkəməsi sentyabrın 11-də Mehman Əliyevi həbsdən buraxıb. Mehman Əliyev barədə başqa yerə getməmək haqqında iltizam qətimkan tədbiri seçilib.
Sentyabrın 18-də “Turan” informasiya agentliyinin bank hesabları açılıb.
