Aşıq Ədalət vəfat edib
Azərbaycan aşıq sənətinin görkəmli nümayəndəsi, ustad sənətkar Aşıq Ədalət sentyabrın 14-də 78 yaşında vəfat edib.
Aşıq Ədalət uzun müddət idi ağır xəstəlikdən əziyyət çəkirdi.
Nəsibov Ədalət Məhəmmədəli oğlu 1939-cu ilin yanvarında Qazax rayonunda anadan olub. Saz çalmağı atasından öyrənib. Gənc yaşlarından fitri istedadı üzə çıxıb, məclislərə dəvət alıb.
Şair Səməd Vurğun Aşıq Ədalətin çalğısının vurğunu olub.
Yazıçı Əziz Nesin söyləyib: “Ədalətin ifası təkrarsız həyat kimidir. Onun üzü daim təzəliyədir, sonu gülüstanlara çıxan dağ çayına bənzəyir. Ələsgər aşıq, söz sənətində kimdirsə, Ədalət də saz sənətində odur”.
“Qaytarma”, “Baş sarıtel”, “Ruhani”, “Yanıq Kərəm” və başqa saz havalarının bənzərsiz ifaçısı olan Aşıq Ədalət Azərbaycanın əməkdar incəsənət xadimi, Prezident təqaüdçüsü idi.
Allah rəhmət eləsin!
