Prezident İlham Əliyev sığortaolunanlar üzrə xüsusi hesaba əlavə vəsaitlərin ödənilməsi qaydasını təsdiqləyib. Novator.az-ın məlumatına görə, qaydaya əsasən, xüsusi hesaba əlavə vəsait ödəmək istəyən şəxs Əmək və Əhalinin Sosial Müdafiəsi Nazirliyinin mərkəzləşdirilmiş informasiya sisteminə (MİS) “Elektron hökumət portalı” və ya nazirliyin “Elektron xidmətlər” bölməsi vasitəsilə gücləndirilmiş elektron imza ilə daxil olaraq elektron ərizə ilə müraciət edir. Müraciət qəbul olunduqdan sonra xüsusi hesaba əlavə vəsait ödəmək istəyən şəxs “Dövlət sosial sığorta sistemində xüsusi hesabı aktivləşdir” elektron xidmətini seçir və nazirliyin müəyyənləşdirdiyi formada məlumatları dolduraraq təsdiqləyir.

Fərdi uçot sistemində qeydiyyatı olmayan şəxs üçün xüsusi hesaba əlavə vəsaitin ödənilməsinə icazə verilmir. 2006-cı il yanvarın 1-nə əmək pensiyası hüququna uyğun olaraq əmək pensiyası kapitalı formalaşan, lakin dövlət sosial sığorta sistemində fərdi hesabı olmayan şəxslər üçün xüsusi hesaba əlavə vəsaitin ödənilməsi onlara fərdi hesab açıldıqdan sonra həyata keçirilir.

Xüsusi hesaba ödənilən əlavə vəsaitlərin məbləği əmək pensiyasının minimum məbləğinin 3300 mislindən çox ola bilməz.

Pensiya təyinatı aparıldıqdan sonra həmin şəxs üçün xüsusi hesaba əlavə vəsaitlərin ödənilməsinə icazə verilmir.

Xüsusi hesaba ödənilən vəsaitlər Dövlət Sosial Müdafiə Fondunun müvafiq xəzinə hesabına mədaxil olunur.

Sığortaolunanlar üzrə ödənilən vəsaitlər məcburi dövlət sosial sığorta haqlarına əlavə olaraq dövlət sosial sığorta sistemində hər bir sığortaolunan şəxsin uçotu dövründə sosial sığorta nömrəsi ilə açılmış fərdi hesabında qeydə alınır.

Fərdi hesablarda qeydə alınan vəsaitlər indeksləşdirilir.

Xüsusi hesaba mədaxil olunmuş vəsaitlərdən əmək pensiyasının minimum məbləğində və ya daha yuxarı məbləğdə pensiya təminatının formalaşdırılması məqsədilə istifadə edilir.

Sığortaolunanın ailə başçını itirməyə görə əmək pensiyası hüququ olan ailə üzvləri xüsusi hesaba ödənilmiş əlavə vəsaitlərdən pensiya təyinatı üçün istifadə etmək hüququna malikdirlər.