Azadlığa buraxılmış “Turan” informasiya agentliyinin direktoru Mehman Əliyev sentyabrın 13-də Novator.az-a açıqlama verib.

Yasamal Rayon Məhkəməsi sentyabrın 11-də Mehman Əliyevi həbsdən buraxıb. Jurnalist avqustun 24-də tutulmuşdu.

Mehman Əliyev Vergilər Nazirliyində qaldırılmış cinayət işi üzrə qanunsuz sahibkarlıq, vergidən yayınma və vəzifə səlahiyyətlərindən sui-istifadədə ittiham olunur.

Novator.az-a açıqlama verən Mehman Əliyev deyib ki, azadlığa buraxılanda ona hansısa konkret tələblər müəyyən edilməyib: “Mənə harasa getməmək qadağası qoyulmayıb, sadəcə gedəndə hüquq mühafizə orqanlarını məlumatlandırmalıyam. Kiminlə istəyirəm görüşürəm, danışıram, yazıram, pozuram. Bu baxımdan da hər hansı qadağalar qoyulmayıb, problem yaşamıram. Sadəcə lazım olanda istintaqa ifadə verməliyəm, çağırılanda getməliyəm”.

Novator.az bildirir ki, əvvəlki informasiyaların əksinə olaraq Mehman Əliyev barədə ev dustaqlığı qətimkan tədbiri yox, başqa yerə getməmək haqqında iltizam qətimkan tədbiri seçilib. Başqa yerə getməmək iltizamını Cinayət-Prosessual Məcəlləsinin 165-ci maddəsi tənzimləyir. Bu tədbir təqsirləndirilən şəxsin cinayət prosesini həyata keçirən orqanın sərəncamında olacağı, həmin orqanın icazəsi olmadan başqa yerə getməyəcəyi, ondan gizlənməyəcəyi, cinayətkar fəaliyyətlə məşğul olmayacağı, təhqiqata, istintaqa və məhkəmə baxışına maneçilik törətməyəcəyi, təhqiqatçının, müstəntiqin, prokurorun və ya məhkəmənin çağırışlarına gələcəyi və yaşayış yerini dəyişməsi haqqında onlara məlumat verəcəyi barədə yazılı öhdəliyindən ibarətdir.