Şuşada şəhid olmuş komandir İsraildə anılıb
İsrailə rəsmi səfər edən müdafiə naziri general-polkovnik Zakir Həsənov Azərbaycanın Milli Qəhrəmanı Albert Aqarunovun qardaşı Rantik Aqarunovla görüşüb. Xəbəri sentyabrın 12-də Mod.gov.az yayıb.
Görüş zamanı Azərbaycanın ərazi bütövlüyü uğrunda şəhid olmuş Vətən övladlarının xatirəsi yad edilib, o cümlədən Albert Aqarunovun həyat yolu, döyüşlərdə iştirakı bir daha xatırlanıb.
Bildirilib ki, Azərbaycanda yaşayan digər xalqların nümayəndələri kimi yəhudi əsilli bu qəhrəman da ölkəni daim vətəni bilib, torpağı uğrunda döyüşüb, canını onun müstəqilliyi və suverenliyi uğrunda fəda edib.
Rantik Aqarunov qardaşının xatirəsinə göstərilən yüksək diqqət və qayğıya görə ailəsi adından Azərbaycan dövlətinə minnətdarlığını bildirib.
Novator.az bildirir ki, Albert Aqarunoviç Aqarunov 1969-cu il aprelin 25-də Bakının Əmircan qəsəbəsində yəhudi ailəsində doğulub.
Qarabağ müharibəsi başlayanda könüllü olaraq cəbhəyə yollanıb, tank komandiri təyin edilib və Şuşada döyüşlərə başlayıb. Onun tankçı ekipajı Xankəndi, Daşaltı, Cəmilli istiqamətlərində düşmənə ağır zərbələr vurub, neçə-neçə işğalçını, düşmənin hərbi texnikasını məhv edib.
1992-ci il mayın 8-də Şuşa uğrunda gedən döyüşlərdə düşmənin 2 tankını və digər texnikalarını məhv edən Albert Aqarunov qeyri-bərabər döyüşdə qəhrəmancasına şəhid olub.
Bakının Şəhidlər xiyabanında dəfn edilib.
1992-ci ilin iyun ayının 7-də Albert Aqarunov Azərbaycanın Milli Qəhrəmanı adına layiq görülüb.
Vaxtilə təhsil aldığı 154 saylı məktəbə Albert Aqarunovun adı verilib.
