27 şəhərin 2-si əsir
Bu mövsüm UEFA Çempionlar Liqasının qrup mərhələsindəki 32 komanda 27 şəhəri təmsil edir. Həmin şəhərlərin 2-si oyunlardan məhrumdur.
Novator.az bildirir ki, Portuqaliya paytaxtı Lissabon, İngiltərənin paytaxtı London və Mançester şəhəri, Rusiya paytaxtı Moskva, İspaniya paytaxtı Madrid turnirdə iki komanda ilə yarışır.
Qalan 22 şəhərdən bir komanda qrup mərhələsinə çıxıb: Bazel (İsveçrə), Münhen, Leypsiq, Dortmund (Almaniya), Paris (Fransa), Brüssel (Belçika), Qlazqo (Şotlandiya), Roma, Turin, Neapol (İtaliya), Ağdam (Azərbaycan), Barselona, Sevilya (İspaniya), Pirey (Yunanıstan), Liverpul (İngiltərə), Maribor (Sloveniya), Donetsk (Ukrayna), Rotterdam (Hollandiya), Monako (Monakonun klubu Fransanı təmsil edir), Portu (Portuqaliya), İstanbul (Türkiyə), Nikosiya (Kipr).
Bu şəhərlərin ikisi – Ağdam və Donetsk işğal altındadır. Azərbaycanın Ağdam şəhərini 1993-cü ildə Ermənistan, Ukraynanın Donetsk şəhərini 2014-cü ildə Rusiyanın dəstəklədiyi separatçılar işğal edib.
24 ildir qaçqın statusunda olan Ağdamın “Qarabağ” komandası Çempionlar Liqasının C qrupuna düşüb, İngiltərənin “Çelsi”, İspaniyanın “Atletiko”, İtaliyanın “Roma” komandaları ilə mübarizə aparır. “Qarabağ”ın ev oyunlarının ünvanı Bakı Olimpiya Stadionudur.
3 ildir qaçqın olan Donetskin “Şaxtyor” komandası F qrupunda İngiltərənin “Mançester Siti”, İtaliyanın “Napoli”, Hollandiyanın “Feyenoord” komandaları ilə mübarizə aparır. “Şaxtyor”un ev oyunları Xarkov şəhərindəki “Metallist” stadionuna təyin olunub.
