Müsavat Partiyasının Avropa Koordinasiya Mərkəzi sentyabrın 9-u Almaniyanın Nürnberq şəhərində “Turan” informasiya agentliyinin direktoru Mehman Əliyevin həbsinə etiraz aksiyası keçirib.

Mehman Əliyev avqustun 24-ü Bakıda tutulub, qanunsuz sahibkarlıq, vergidən yayınma və vəzifə səlahiyyətlərindən sui-istifadədə ittiham olunur. İstintaq iddia edir ki, Mehman Əliyev dövlət qeydiyyatına alınmamış qrant müqavilələri üzrə qanunsuz gəlir əldə edib və mənfəət vergisini dövlət büdcəsinə ödəməkdən yayınıb.

Azadliq.org-un məlumatına görə, sentyabrın 9-u Nürnberqdə “Siyasi məhbuslara azadlıq!” şüarı ilə keçirilən mitinqə Avropada yaşayan bir qrup azərbaycanlı fəal qatılıb. İştirakçılar mitinq meydanına həbsxanaya işarə olaraq dəmir barmaqlıqlar gətiriblər, siyasi məhbusların fotoları yer alan, “Azərbaycan jurnalistikasını dəfn etməyin!”, “Bütlər dağılmalı!”, “İlham Əliyev, Mehman Əliyevi, Gözəl Bayramlını, Əfqan Muxtarlını azad et”, “Bayrama, Qiyasa azadlıq”, “İlqar Məmmədov azadlığa buraxılsın” yazılmış plakatlar qaldırıblar, ictimai-siyasi fəalların və jurnalistlərin həbsdən buraxılmasını tələb ediblər.

Azərbaycanın bəzi hüquq müdafiəçilərinin tərtib etdiyi siyasi məhbus siyahısında 160 şəxsin adı var. Siyahıdakı şəxslərin 10-u jurnalist və bloqçudur.