Hökumət Lenini basdırmaq istəmir
Rusiya hökuməti paytaxt Moskvanın Qızıl Meydanındakı mavzoleydə saxlanan Vladimir Leninin dəfn olunması layihəsini qəbul etməyib. Etiraz qərarı sentyabrın 8-də açıqlanıb.
Novator.az-ın məlumatına görə, qanun layihəsini parlamentin aşağı palatası olan Dövlət Dumasına müxalif Liberal Demokrat Partiyasından üç deputat təqdim edib, hakim Vahid Rusiya Partiyasının üç deputatı da sənədi dəstəkləyib.
Rusiya hökuməti qanun layihəsinə Leninin dəfni üçün maliyyə mənbələrinin göstərilməməsini irad tutub, prosesin büdcədən vəsait ayrılmasına gətirəcəyini vurğulayıb. Hökumətin layihə müəlliflərinə cavab məktubunda o da qeyd olunub ki, dəfn işlərinin təşkili fərdi-hüquqi xarakter daşıyır və qanunla tənzimlənə bilməz.
Vladimir Lenin (Ulyanov) Rusiyada bolşevik inqilabının lideri, sovet dövlətinin qurucusudur. 1924-cü ildə vəfat edən Lenin o vaxtdan mavzoleydə saxlanır.
Leninin dəfn olunmasını təklif edənlər bunu ictimai rəy sorğularının nəticələri ilə əsaslandırırlar. Bu ilin aprelində Ümumrusiya İctimai Rəyi Öyrənmə Mərkəzi Vladimir Leninin dəfn olunması ideyasına münasibəti araşdırıb. Sorğuya qatılanların 32%-i bildirib ki, Lenini tezliklə dəfn eləmək lazımdır, 31% isə onun ideyalarını daşıyanların qəlbini qırmamaq üçün hələlik gözləməyi məsləhət bilib. Respondentlərin 31%-i Leninin həmişəlik mavzoleydə qalmasını istəyib.
Hazırda Rusiyanın rəsmi xəbər agentliyi “RİA Novosti”nin saytında “Lenini dəfn etmək lazımdırmı” sualı ilə internet sorğusu keçirilir. Səsverməyə qatılanların 62%-ə yaxını Leninin dəfninə tərəfdar çıxıb.
Səidə Hüseynova
