Bakıdakı “26” kafesi bağlandı
Bakının mərkəzində “26” adlı kafe açanları cinayət məsuliyyəti gözləyir. “Trend”in 8 sentyabr məlumatına görə, bunu Bakı Şəhər İcra Hakimiyyətinin başçısı Hacıbala Abutalıbov deyib.
Hacıbala Abutalıbov xatırladıb ki, 1918-ci ildə Stepan Şaumyanın başçılığı ilə azərbaycanlılara qarşı soyqırımı təşkil etmiş 26 Bakı komissarının paytaxtdakı abidəsi bir neçə il öncə götürülüb, komissarların məzarları şəhərin mərkəzindən çıxarılıb: “Təəssüf edirəm ki, indi Bakının mərkəzində, Yazıçılar Birliyinin binasının bir hissəsini icarəyə götürərək “26” adlı kafe açıblar. Qoy ermənilər və havadarları bilsinlər ki, nə qədər Azərbaycan xalqı var, erməni qatillərə, soyqırımı təşkilatçılarına və onların havadarlarına Azərbaycanda yer yoxdur və heç zaman da olmayacaq”.
İcra başçısı əlavə edib ki, obyekt bağlanıb və cavabdeh şəxslər cinayət məsuliyyətinə cəlb olunacaq.
Hazırda kafenin fəaliyyəti dayandırılıb, əmlakı daşınıb.
