Prezident İlham Əliyev ötən il noyabrın 24-də imzaladığı fərmanla publik hüquqi şəxsə çevrilmiş Müəllif Hüquqları Agentliyinin (əvvəlki statusu mərkəzi icra hakimiyyəti orqanına bərabər idi) və İcbari Tibbi Sığorta üzrə Dövlət Agentliyinin (əvvəl Nazirlər Kabineti yanında icra hakimiyyəti orqanı idi) nizamnamələrini təsdiqləyib.
Novator.az-ın məlumatına görə, 6 sentyabr fərmanı ilə Müəllif Hüquqları Agentliyinin nizamnamə fondunun miqdarının müəyyən edilməsi; icra orqanının yaradılması, onun səlahiyyətlərinin müəyyənləşdirilməsi və səlahiyyətlərinə vaxtından əvvəl xitam verilməsi; agentliyin yenidən təşkili və ləğv edilməsi prezidentin səlahiyyətinə aid edilib.
Nazirlər Kabinetinə agentliyin strukturunu, işçilərin say həddini və illik maliyyə hesabatlarını təsdiq etmək həvalə olunub.
Agentliyin ilkin nizamnamə fondu dövlət büdcəsinin vəsaiti hesabına formalaşır və 1 milyon manat təşkil edir. Qurumun İdarə Heyətinin sədrinin vəzifəyə təyin və vəzifədən azad edilməsini prezident həyata keçirir.
İcbari Tibbi Sığorta üzrə Dövlət Agentliyinin illik maliyyə hesabatlarının təsdiq edilməsi; icra orqanının yaradılması, onun səlahiyyətlərinin müəyyənləşdirilməsi və səlahiyyətlərinə vaxtından əvvəl xitam verilməsi; təsərrüfat cəmiyyətlərinin yaradılmasına və ya onlarda iştirak etməyə, idarə, filial və nümayəndəliklərinin yaradılmasına razılıq verilməsi dövlət başçısının səlahiyyətində olacaq.
Agentliyin ilkin nizamnamə fondu 4 milyon manatdır, dövlət büdcəsinin vəsaiti hesabına formalaşır. Qurumun fəaliyyətinə rəhbərliyi həyata keçirmək məqsədi ilə İdarə Heyəti yaradılır.
