“Turan”ın abunəçilərə müraciəti
Avqustun 31-də “Turan” informasiya agentliyinin kollektivi abunəçilərə müraciət edib. Müraciətdə deyilir: “Hörmətli abunəçilər, çox güman, “Turan” agentliyinin ətrafında baş verənlərdən və yaranmış problemlərdən xəbərdarsınız. Vergi ödəməkdən yayınma üzrə cinayət işi çərçivəsində təşkilatın hesabları dondurulub. Belə olan şəraitdə informasiya əldə edilməsi və satışı ilə məşğul olan agentliyin normal fəaliyyət göstərməsi mümkün deyil. Bu səbəbdən işi dayandırıb istintaqın sonunadək gözləməyi qərara aldıq.
Hələlik sizin informasiya əldə etməniz üçün öz şəxsi imkanlarımızdan və vəsaitimizdən istifadə edərək volontyor kimi fəaliyyət göstərəcəyik. Sayt (www.turan.az) əvvəlki kimi fəaliyyət göstərəcək, bülletenlər isə elektron poçtla göndəriləcək. İnformasiya həcmi obyektiv səbəblərdən azalacaq. Ümid edirik ki, bu, anlayışla qarşılanacaq”.
Novator.az xatırladır ki, Vergilər Nazirliyinin Vergi Cinayətlərinin İbtidai Araşdırılması Departamenti “Turan”ın 2010-2017-ci illərə aid maliyyə fəaliyyəti üzrə cinayət təhqiqatı aparır. Avqustun 24-də agentliyin direktoru Mehman Əliyev həmin departamentə dəvət olunaraq tutulub. Yasamal Rayon Məhkəməsi avqustun 25-də Vergi Cinayətlərinin İbtidai Araşdırılması Departamentinin təqdimatı əsasında jurnalisti 3 aylıq həbs edib. Bakı İstintaq Təcridxanasında saxlanan Mehman Əliyev qanunsuz sahibkarlıq, vergidən yayınma və vəzifə səlahiyyətlərindən sui-istifadədə ittiham olunur.
İstintaq iddia edir ki, Mehman Əliyev 2010-2014-cü illərdə dövlət qeydiyyatına alınmamış qrant müqavilələri üzrə 148310 manat məbləğində qanunsuz gəlir əldə edib, 2010-2016-cı illərdə 60080 manat məbləğində mənfəət vergisini dövlət büdcəsinə ödəməkdən yayınıb.
