Azərbaycanı ən çox 20-24 yaşlı şəxslər tərk edir
Ötən il Azərbaycana daimi yaşamaq üçün 3233 nəfər gəlib. Bu, 2015-ci illə müqayisədə 584 nəfər çoxdur. AZƏRTAC Dövlət Statistika Komitəsinə istinadla belə xəbər yayıb.
Rəsmi hesabata görə, 2016-cı ildə immiqrantların sayına görə MDB ölkələri önə çıxıb: 1493 nəfər. Son sıradakı Yunanıstandan isə Azərbaycana yaşamaq üçün cəmi 1 nəfər gəlib.
Hesabata əsasən, 2016-cı il immiqrantlarının 1402 nəfəri kişi, 1831 nəfəri qadındır.
Azərbaycana daimi yaşamaq üçün gələnlərin əsas hissəsi 30-34 yaşlı adamlar olub.
Ötən il ölkəyə gələnlərin 2829 nəfərinin əmək qabiliyyətli şəxslər olduğu bildirilir.
Dövlət Statistika Komitəsi 2016-cı ildə Azərbaycandan daimi yaşamaq üçün gedənlərin sayını 1711 nəfər göstərir. Bu, 2015-ci illə müqayisədə 154 nəfər çoxdur.
Azərbaycanlıların ən çox üz tutduğu məkan MDB ölkələri olub: 1474 nəfər.
Azərbaycandan gedənlərin sayına görə Latviya və Estoniya sonuncudur (2 nəfər).
Ötən il ölkədən gedənlərin 818 nəfəri kişi, 893 nəfərini isə qadın olub.
Daimi yaşamaq üçün Azərbaycanı tərk edənlər arasında 20-24 yaşlılar (364 nəfər) üstünlük təşkil edib.
80 və yuxarı yaşlı sakinlərdən isə 1 nəfər başqa ölkəyə gedib.
Ötən il ölkəni tərk edənlərin 1577 nəfərinin əmək qabiliyyətli şəxslər olduğu vurğulanır.
