ATƏT Cənubi Qafqazdan tam çıxıb getdi
Avqustun 31-də ATƏT-in Yerevan ofisi fəaliyyətini dayandırıb. Novator.az-ın məlumatına görə, 17 il əvvəl açılmış ofisdən ATƏT-in bayrağı endirilib.
Beləliklə, Cənubi Qafqazda ATƏT-in heç bir ofisi qalmayıb. Gürcüstanda ATƏT-in missiyası 2008-ci ildə başa çatıb, Azərbaycanın paytaxtı Bakıdakı ofis isə 2015-ci ildə qapanıb.
Bu il mayın 4-də ATƏT Daimi Şurasının Vyanada keçirilən iclasında Yerevan ofisinin mandatını uzatmaq məsələsinə baxılıb. Azərbaycan mandatın uzadılmasına razılıq verməyib. Rəsmi Bakı ATƏT-in Yerevan ofisinin son illər həyata keçirdiyi minalardan təmizləmə fəaliyyətinə etirazını bildirib. Xarici İşlər Nazirliyi bəyan edib ki, təşkilatın minalardan təmizləmə fəaliyyəti mandatın açıq-aşkar pozulmasıdır, üstəlik minalardan təmizləmə fəaliyyəti Azərbaycanın işğal olunmuş ərazilərini də əhatə edib.
1975-ci ildə yaradılmış ATƏT-in 57 üzvü var. Təşkilatda qərarlar konsensusla qəbul olunur, yəni hər hansı bir üzv ölkənin vetosu qərarı əngəlləyir.
