Özünüməşğulluq proqramı ilə bağlı yeni hesabat
Əmək və Əhalinin Sosial Müdafiəsi Nazirliyinin 30 avqust məlumatına görə, özünüməşğulluq proqramı çərçivəsində Şəki, Kürdəmir, İmişli, Sabirabad, Mingəçevirdə 20 nəfərə yaxın şəxsə aktivlər (mal və materiallar) təqdim olunub. Bununla 2017-ci ilin fevralında aktivlərin verilməsinə başlanandan bəri proqram iştirakçılarından 875 nəfərin biznes-planlarını reallaşdırmaları üçün aktivlərlə təminatı həyata keçirilib.
50 rayon və şəhər (Tərtər, Laçın, Hacıqabul, Ağcabədi, Beyləqan, Bərdə, Qəbələ, Ağdam, İsmayıllı, Göyçay, Ağsu, Saatlı, Biləsuvar, Yevlax, Füzuli, Cəbrayıl, Şirvan, Lerik, Masallı, Astara, Salyan, Cəlilabad, Sabirabad, Kürdəmir, Mingəçevir, Naftalan, Samux, Göygöl və b.) üzrə proqramın icrası başa çatdırılıb. 26 rayon və şəhər (Lənkəran, Ağdaş, Goranboy, Gəncə, Şəmkir, Gədəbəy, Tovuz, Xaçmaz, Şəki, Bakı şəhərinin rayonları, Sumqayıt və s.) üzrə isə aktivlərin verilməsi davam etdirilir.
Özünüməşğulluq proqramı çərçivəsində müvafiq təlim kurslarını bitirmiş və qiymətləndirmələr zamanı biznes-planları müsbət dəyərləndirilmiş ümumilikdə 1400 nəfərə yaxın şəxsin ailə təsərrüfatlarını qurmaları nəzərdə tutulub.
