Əraziyə baxış davam edir
Müdafiə Nazirliyinin Xızıdakı N saylı hərbi hissəsinin sursat anbarında baş vermiş partlayışdan sonra ərazi yoxlanır. Azərbaycan Respublikası Ərazilərinin Minalardan Təmizlənməsi üzrə Milli Agentliyin (ANAMA), Fövqəladə Hallar Nazirliyinin və Daxili Qoşunların nümayəndələri avqustun 28-də hərbi hissənin ətrafına, 1 ferma ərazisinə, 1 əkin sahəsinə, Sitalçay kənd orta məktəbinin həyətinə, dəmir yolu xəttinə, rabitə qovşağının həyətinə, 6 ev və həyətyanı sahəyə baxış keçirib. Yoxlamada 27 ədəd partlamamış hərbi sursat və 15 ədəd partlamış-yanmış sursat qalıqları aşkar olunaraq götürülüb.
ANAMA-dan AZƏRTAC-a bildirilib ki, 2 gün ərzində 320 min kvadratmetr əraziyə baxılıb, 36 ədəd partlamamış hərbi sursat və 37 ədəd partlamış-yanmış sursat qalıqları tapılıb.
Giləzi qəsəbəsi və Sitalçay kəndi ərazisində 259 nəfər yerli sakin arasında mina təhlükəsizliyinə dair maarifləndirmə aparılıb.
Avqustun 27-də Xızıdakı N saylı hərbi hissənin utilizasiya üçün hazırlanmış silah-sursat anbarında yanğın və partlayışlar baş verib. Hadisə yerində işləyən 6 şəxs yüngül dərəcəli bədən xəsarətləri alıb.
Hadisənin baş vermə səbəblərinin müəyyənləşdirilməsi və müvafiq təhlükəsizlik tədbirlərinin həyata keçirilməsi məqsədilə Müdafiə, Fövqəladə Hallar, Daxili İşlər, Səhiyyə nazirlikləri, Dövlət Sərhəd Xidməti, Baş Prokurorluq, yerli icra strukturları və digər dövlət orqanlarının nümayəndələrindən ibarət komissiya yaradılıb.
Respublika Hərbi Prokurorluğunda Cinayət Məcəlləsinin 223.2-ci (partlayış təhlükəli obyektlərdə təhlükəsizlik qaydalarını pozma ağır nəticələrə səbəb olduqda) və 342.2-ci (qulluğa səhlənkar yanaşma ağır nəticələrə səbəb olduqda) maddələri ilə cinayət başlanıb.
