Qırğızıstan parlamentinə Sapar İsakovun baş nazir postuna təsdiqi məsələsinə baxmaq tövsiyə olunub. Novator.az-ın məlumatına görə, Sapar İsakovu hakim koalisiya namizəd göstərib.
40 yaşlı Sapar İsakov 2017-ci ilin martından Prezident Administrasiyasının rəhbəri postunu tutur.
Əvvəlki baş nazir Sooronbay Jeenbekov avqustun 21-də prezident seçkisinə qatılmaq üçün istefa verib. Prezident seçkisi oktyabrın 15-də keçiriləcək.
Qırğızıstanda baş nazirin rəhbərlik etdiyi hökumət ali icraedici orqandır. Baş nazir postuna namizədi 120 yerlik parlamentdə deputatların yarıdan çoxunu təşkil edən fraksiya və ya koalisiya irəli sürür. Parlament hökumətin tərkibini və proqramını təsdiqlədikdən sonra prezident baş naziri və hökumət üzvlərini vəzifəyə təyin edir.
Qırğızıstan hökumətini Sosial Demokrat, Qırğızıstan və Bir Bol partiyalarının parlament fraksiyaları qurub.
