Mehman Əliyev: həbs, ittihamlar, bioqrafiya
Avqustun 25-də Yasamal Rayon Məhkəməsi “Turan” informasiya agentliyinin direktoru Mehman Əliyevlə bağlı 3 aylıq həbs qətimkan tədbiri seçib. Novator.az bildirir ki, məhkəmə prosesini hakim Azər Tağıyev aparıb.
Qərar Vergilər Nazirliyinin Vergi Cinayətlərinin İbtidai Araşdırılması Departamentinin təqdimatı əsasında çıxarılıb. Mehman Əliyev qanunsuz sahibkarlıq, vergidən yayınma və vəzifə səlahiyyətlərindən sui-istifadədə ittiham olunur.
Vergi Cinayətlərinin İbtidai Araşdırılması Departamenti “Turan”ın 2010-2017-ci illərə aid maliyyə fəaliyyəti üzrə cinayət təhqiqatı aparır. Mehman Əliyev bu cinayət işi ilə əlaqədar avqustun 24-də saxlanıb.
Avqustun 25-də “Turan” agentliyinin kollektivi bəyanat yayıb. Bəyanatda deyilir ki, “Turan”ın bank hesabları dondurulduğu üçün kollektiv sentyabrın 1-dən öz fəaliyyətini qeyri-müəyyən vaxtadək dayandıracaq.
Mehman Əliyev 1957-ci il oktyabrında 26-da Bakının Buzovna kəndində anadan olub. Moskva Dövlət Universitetinin jurnalistika fakültəsini bitirib. “Molodyoj Azerbaydjana” qəzetinin, “Azərinform” agentliyinin (indiki AZƏRTAC) müxbiri, “Xazar” jurnalının məsul katibi olub, prezidentin mətbuat xidməti rəhbərinin müavini vəzifəsində çalışıb.
Mehman Əliyev 1990-cı ildə təsis etdiyi “Turan” informasiya agentliyinin direktorudur.
Ailəlidir, bir qızı var.
